Францын Ерөнхийлөгч Франсуа Олланд АНУ-д төрийн айлчлал хийхээр ганц биеэр хүрэлцэн ирээд байна. Хэдхэн хоногийн өмнө тэргүүн хатагтайгаасаа салж, улс төрийн рейтинг нь ч урьд өмнө байгаагүй хамгийн доод түвшиндээ хүрчихээд байгаа Францын Ерөнхийлөгч зориулан Цагаан ордон төрийн хүндэтгэлийн зоог бэлтгээд байна. Гэхдээ Ф.Олландын айлчлалын үеэр өрнөх албан хэлэлцээрүүд хүндэтгэлийн арга хэмжээнээс илүү  чухал гэдэг нь ойлгомжтой. Тэрээр АНУ-ын Ерөнхийлөгчтэй Ираны асуудлаас эхлээд хоёр улсын худалдаа, дэлхийн цаг уурын өөрчлөлт зэрэг олон сэдвээр яриа өрнүүлэхээр төлөвлөжээ.  Тэдний энэ урт яриа Виржиния дахь Ерөнхийлөгч Томас Жефферсоны гэр рүү хамтдаа нисэх үед ч үргэлжилжээ. АНУ-ыг үндэслэгчдийн нэг, мөн тус улсын Франц дахь төлөөлөгч асан Томас Жефферсон гэрт хоёр Ерөнхийлөгч зочилсны зэрэгцээ Виржиниягийн их сургуулийн кампусаар оржээ. Ф.Олланд өндөр дээд хэмжээний яриа хэлэлцээрээ дуусгасны дараа АНУ-ын Цахиурын хөндийд зочилж Facebook, Twitter, Google зэрэг компанийн удирдлагуудтай уулзах юм байна.
Францын Ерөнхийлөгч нараас хамгийн сүүлд Жак Ширак 1996 онд АНУ-д төрийн айлчлал хийж байжээ.