Энэ зун бүрэн эрхийн нь хугацаа дуусах Оросын төмөр замын “РЖД” нийгэмлэгийн тэргүүн Владимир Якунинг ойрын 10 хоногт ажлаа Тээврийн сайд асан Игорь Левитинд өгөх нь хэмээн екатеринбургийн Znak.com сайтад бичжээ. Эх сурвалжийн мэдээлснээр бол энэ нь компанийн удирдлагын мэдээллийн кампанийн үргэлжлэл гэлээ ч Якунин ажлаа өгөх нь үнэн гэнэ. Гэхдээ бас түүний ажлыг авах хүний нэр дотор РЖД-гийн өнөөгийн захирлуудын зөвлөлийн дарга Кирилл Андросовын нэр бас явж байна.
Өөр нэг эх сурвалжийнхаар бол үнэ тариф өссөн, үйлчилгээний чанар муудсан, үр ашиггүй үйл ажиллагаа явуулж байгаа гэсэн буруутгал Якунин руу чиглэж байгаа гэнэ. РЖД үр ашиггүй ажиллаж байгаа тухайд бол өнгөрсөн нэгдүгээр сард болсон форум дээр Ерөнхий сайдын орлогч Аркадий Дворкович хатуухан шүүмжлээд авсан.
РЖД-гийн хэвлэлийн нарийн бичгийн дарга Александр Перков болохоор даргынх нь бүрэн эрхийн хугацаа энэ зун дуусна, харин сунгах эсэхийг мэдэхгүй гэсэн бол Ерөнхий сайдын хэвлэлийн нарийн бичгийн дарга Наталья Тимакова, энд дурдагдаад байгаа Кирилл Андросов нар тайлбар хийхээс татгалзсан байна.