Сумдад засмал зам тавих асуудал манай улсын хувьд орхигдсон. Харин Сайншанд-Замын-Үүд чиглэлийн 116,25 км замыг ашиглалтад өгснөөр Замын-Үүд нийслэлтэй засмал замаар бүрэн холбогдож дууссан юм. Үүний зэрэгцээ засмал замыг барих ажлын үеэр Дорноговь аймгийн Айраг сум руу 1.7 км зам тавьсан нь сумдын хувьд томоохон дэвшил байлаа. Түүнчлэн тус сумын 90 жилийн ой энэ жил тохиох бөгөөд ойг угтсан олон арга хэмжээ болсон байна. Тухайлбал, тус сумын гэрэлтүүлгийг шинэчилж, бүтээн байгуулалтын хүрээнд олон шинэ орон сууц ашиглалтад оруулжээ.
Мөн энэ сарын 14-нд сумын 260 гаруй уугуул иргэд Улаанбаатар хотод сар шинийн золголтоо хийсэн бол 15-нд Айраг сумын харьяалалтай Уул уурхайн чиглэлээр үйл ажиллагаа явуулдаг компаниуд нутгийн удирдлагатайгаа хуралдсан байна. Түүнчлэн энэ сарын 16-нд “Ардчиллын ордон” дахь хурлын зааланд сумын залуучууд болон оюутны нэгдсэн уулзалтыг зохион байгуулжээ. Үйл ажиллагаанд сумын Засаг дарга С.Ганбаатар, Засаг даргын орлогч Ж.Мөнхсэргэлэн, ИТХ-ын дарга Б.Туулайхүү,  Улаанбаатар хот дахь нутгийн зөвлөлийн дарга Г.Батсайхан болон нутгийн зон олон оролцжээ.