Умард Солонгосын удирдагч Ким Чен Уныг хүн төрөлхтний эсрэг гэмт хэрэг өдүүлж байна гэж НҮБ буруутгалаа. Энэ талаар даваа гарагт Швейцарийн Женев хотноо тараасан НҮБ-ын Хүний эрхийн зөвлөлийн илтгэлд дурдсан байна.
Илтгэл бичсэн шинжээчид БНАСАУ-д хүний эрхийг зөрчиж улмаар хүн төрөлхтний эсрэг гэмт хэрэг өдүүлж байна гэсэн дүгнэлт гаргалгаа хийжээ. Ийм ч учраас БНАСАУ-ын удирдагчийг Олон улсын эрүүгийн шүүхэд дуудах ёстой гэсэн байна.

Илтгэлд “Тус улсад иргэд үзэл бодлоо илэрхийлэх, шашин шүтэх, хурал цуглаан хийх, эвлэлдэн нэгдэх эрх бүрэн хаалттай байна” гээд тэр бүү хэл шилжин явах, амьдрах газраа өөрөө сонгох эрхгүй байна гэжээ. Энэ шинжээчдйин баг, комиссын бүрэлдхүүнд Австралийн дээд шүүхийн шүүгч Майкл Керби, Сербийн хүний эрхийг хамгаалагч Соня Бисерко, БНАСАУд хүний эрхийг хамгаалах асуудлаарх тусгай илтгэгч Индонезийн Марзуки Дарусман нар орсон юм байна. БНАСАУ энэ комиссынхныг эх орондоо оруулах зөвшөөрөл өгөөгүйгээс тэд Өмнөд Солонгос, Их Британи, АНУД ажиллаж Умард Солонгосоос саяхан дүрвэн гарч очсон хүмүүс, өөр бусад гэрчүүд зэрэг 240 гаруй хүнтэй  уулзаж санал асуулга авч энэ илтгэлээ бичжээ.

Харин энэ илтгэлийг Пеньян няцаан эсэргүүцэж байна. Пеньяны албан ёсны няцаалтад “Энэ илтгэлийн бүхий л зүйлийг шийдвэртэй няцаан эсэргүүцэж байна” гэжээ. Мөн “Энэ илтгэл бол БНАСАУ дахь хүний эрхийн нөхцөл байдал гэдэг материалын бас нэг худал хуулбар. Үүнийг БНАСАУ-д дайсагнах үүднээс зүгээр л санаанаасаа зохиож бичсэн зүйл” гэж Женевт байгаа БНАСАУ-ын НҮБ болон бусад олон улсын байгууллагад суугаа байнгын төлөөлөгч мэдэгдсэн байна.