Украины Ерөнхийлөгч Виктор Янукович өчигдөр сөрөг хүчний удирдагчтай энхийн гэрээ байгуулмагцаа нийслэл Киевийг ум хумгүй орхисон. Түүнийг явмагц Ерөнхийлөгчийн хувийн өргөө харш нь ч эзгүйрч, украинчууд төрийн тэргүүнээ хэрхэн тансаглаж байсныг нүдээр үзэх боломж олдов.
В.Янукович 2010 онд Ерөнхийлөгч болоод удаагүй байхдаа Киевээс цаг орчим явах зайтай Межигиряд газар аваад, эзэмшлээ аажим аажмаар өргөжүүлсээр  өдгөө 140 га газар бүхий тансаг эдлэнтэй болоод байжээ. Монако улсын газар нутгийн талтай тэнцэхүйц хэмжээний энэ том эдлэн дотор орос маягийн таван давхар байшин, гольфийн талбай, хиймэл нуур, нисдэг тэрэг буух талбай, жижиг хэмжээний амьтны хүрээлэн хүртэл тансаг зэрэглэлийн юм юм байдаг аж.

Энэ тансаг эдлэнгийн эзэн нь нэгэнт эрх мэдлээсээ унасан тул энэ дашрамыг ашиглаж украинчууд урьдын цагт хаалттай байсан энэ газар ирж, доторхийг нь үзэж сонирхсон байна. Хотоос гарч салхилангаа Ерөнхийлөгчийн ордныг үзэх гэсэн хүмүүс амралтын өдөр Межигиряд дүүрэн холхиж байсан бөгөөд байшин доторх тансаг эд хэрэглэл, тавилга сэлт, машины гараашт нь агуулж буй хэдэн сая ам.долларын үнэтэй спорт машинууд, уужим том гольфийн талбай зэргийг хараад өөрийн эрхгүй толгой сэгсэрч байжээ. Тэд эдлэн дундуур зугаалж, зарим үзэмжтэй хэсэгт нь зургаа татуулж амжжээ.











Сөрөг хүчний жагсагчид Ю.Януковичийн ордноос олсон бичиг баримтуудаа ялган ангилж байгаа нь.

Зарим бичиг баримтын шатаасан байжээ.