УИХ-ын гишүүн Д.Арвингийн “Их өргөө” компанийг  улсын томоохон  тендерийг авч байсан бүрэн эрхтэй хэмээн боддог ч үнэн хэрэг дээрээ АТГ-аас шалгалтанд ороод буй Н.Ганзориг захиралтай “Нийслэл өргөө” компанитай иргэд байнга андуурдаг гэнэ. Д.Арвин гишүүн “энэ бол “Нийслэл өргөө” компаниар мөнгө угаадаг УИХ-ын гишүүдийн зориуд хийсэн ажил” хэмээв. Төрийн ордны өргөтгөлийг олон тэрбумаар барьсан, дөрөвдүгээр төрөхийн тендер аваад гацаагаад байгаа “Нийслэл өргөө”-г албаар “Их өргөө” компанитай андуурахад хүргэж, УИХ-ын гишүүн Д.Арвингийн нэрийг хойш нь чангааж, доош нь татахыг хүсэгчдийн хийсэн ажил гэнэ. Өнөөдөр барилгын салбарт багагүй орон зай эзлэн тогтвортой үйл ажиллагаа явуулж байгаа Д.Арвин гишүүний “Их өргөө” компани түүнийг УИХ-д сонгогдсон цагаас эхэлж 2000-2008 он хүртэл бараг үйл ажиллагаа явуулалгүй зогссон аж. Хүү нь том болж Д. Арвин гишүүний санаачлан байгуулсан компанийг 2008 оноос ахин сэргээн удирдаж буй гэнэ. Тус компани одоогоор Баянзүрх дүүргийн гэр хорооллын дахин төлөвлөлтийн төсөлд оролцож, актлагдсан барилгуудыг шинээр барих төсөл өөрийн хөрөнгөөр хэрэгжүүлж эхэлсэн аж.

Өнгөрсөн 2012 оны сонгуулиар УИХ-ын гишүүн Д.Арвин Баянзүрх дүүрэгт МАН-аас нэр дэвшихэд намдаа өргөл болгон 250 сая төгрөг өгсөн нь хүүгийнх нь ач гэнэ. Хүүгийнхээ компаниас энэ мөнгийг авч, сурталчилгааны мөнгөө найз нөхдөөсөө босгосон. Зарим талаар өр тавьсан. Тэрийгээ ирэх сонгууль хүртэл барагдуулна хэмээн тэрээр өчигдөр “ам нээлээ”.Тэрээр өмнө нь тэр өнгөрсөн сонгуулиар ч тэр нэг ч удаа намаасаа мөнгө авч байгаагүй гээд уг нь МАН-ын дарга нар онгоцоор яваад л өчнөөн тэрбумаар нь тараадаг. Гэхдээ намайг дандаа орхиж байсан хэмээн гомдоллохоо ч мартсангүй. Ямартай  ч улстөрч ээжийгээ дэмжин намынх нь өргөл барьцыг бүрдүүлж өгсөн “Их өргөө” компанийн захирал хүүг нь сайшаахаас өөр үг үгүй.