Украины Бүгд найрамдах автономит Крым улсын парламент гуравдугаар сарын 6-ны хуралдаанаараа “ОХУ-ын бүрэлдхүүнд бүрэн эрхт субъект болж орох” тухай шийдвэр гаргасныг хууль тогтоох дээд байгууллагын нь 81 депутатын 79 нь дэмжжээ. 

Гэхдээ гуравдугаар сарын 16-ны өдөр хоёр асуултаар бүх нийтийн санал асуулга явуулахдаа Крым 1992 оны үндсэн хууль эргэн орох уу, ОХУ-ын бүрэлдхүүнд орох уу гэсэн асуултаар авах юм байна.
1992 оны Үндсэн хуульд эргэн орно гэдэг нь Украины бүрэлдхүүнд хэвээр үлдэж Украинтай гэрээ хэлэлцээрийн харилцаатай байна гэсэн үг юм байна.

Санал асуулгын хуудсыг орос, украин, крымын татар хэл дээр хэвлэж тараах гэнэ. Үүний зэрэгцээ энэ шийдвэрт “Крымын автономит бүгд найрамдах улсын дээд зөвлөл ОХУ-ын ерөнхийлөгч, Холбооны зөвлөл, ОХУ-ын Төрийн думд хандаж тус бүгд найрамдах улсыг ОХУ-ын бүрэлдхүүнд нэгтгэх бэлтгэл ажлыг эхлүүлэх”-ийг хүсчээ.

Харин Крымын дээд зөвлөлийн депутат Сергей Шувайников “Севастополийн иргэд бол Украины газар нутаг, засаг захиргааны нэг хэсэг. Тэд автономит Крымын бүрэлдхүүн биш. Гэхдээ гуравдугаар сарын 16-ны санал асуулгад оролцоно. Бид иргэддээ өөрийнхөө санал бодлыг илэрхийлэх  боломж олгоно” гэсэн байна.

Үүний өмнө ОХУ-ын ерөнхийлөгч Владимир Путин оросын эрх баригчид Крымын автономит бүгд найрамдах улсыг Оросын бүрэлдхүүнд оруулах боломжийг авч үзэхгүй байгаа гэсэн юм.