Украины нийслэл Киевийн иргэн 16 настай Андрей Сенько 10 жилийн өмнө ОХУ-ын ерөнхийлөгч Владимир Путинаас бэлгэнд авсан ерөнхийлөгчийн цагаа эргүүлж өгөхөө мэдэгдсэн байна.
2004 онд ОХУ-ын ерөнхийлөгч Владимир Путиныг Украины нийслэлд айлчлах үеэр түүнд интернетээр маш олон асуулт тавьж байсан юм. Үүн дотор 6 настай Андрей хүү оросын ерөнхийлөгчтэй уулзаж юу мөрөөддөг вэ хэмээн асуухад Владимир Путин “Манай дэлхий дээр бүх хүн аз жаргатай байгаасай” гэж мөрөөддөг хэмээн хариулж энэ асуултынх нь төлөө бяцхан хүүд бугуйн цагаа бэлэглэж байжээ.

Харин 10 жилийн дараа өсвөр насны хүү Андрей Сенько ОХУ-ын Ерөнхийлөгчийн цагийг эргүүлж өгөхөөр шийдсэн байна. “Та намайг хуурчээ. Ийм болохоор би таны бэлгийг буцааж өгөхөөр шийдлээ. Хэрэв тантай хувиараа уулзах боломж байсан бол би таны нүүрэн дээр Владимир Владимирович та бол худалч” гэж хэлэх байсан гэж хүүгийн хэлснийг “Эхо Москвы” иш татсан байна.
Андрей бас багаасаа л өөрийнхөө эх оронд хайртай болж хүмүүжсэн болохоор одоо Украин орныхоо энхтайван байдлыг хамгаалахад бэлэн гэжээ.