Украин улс ОХУ-тай иргэд нь харилцан визтэй зорчдог боллоо хэмээн тус улсын Үндэсний аюулгүй байдал, Батлан хамгаалах хорооны зөвлөлийн нарийн бичгийн дарга Андрей Парубийн мэдэгдлийг иш татан “Интерфакс” агентлаг мэдээллээ. Парубийн үгээр бол Украины Гадаад хэргийн яам ойрын үед энэ талаарх журам гаргаж ОХУ-ын иргэдийг тус улсад зөвхөн гадаад паспортаар, визтэй ордог болгох юм байна. Энэ ажлыг тун ойрын хугацаанд амжуулж бэлэн болгохыг Үндэсний аюулгүй байдал, Батлан хамгаалах хороо Гадаад яаманд даалгажээ.
Үүнээс гадна Украины засгийн газар Крымээс украины иргэдийг нүүлгэн шилжүүлэх асуудлыг ч боловсруулж эхэлсэн байна. Мөн Үндэсний аюулгүй байдал, батлан хамгаалах хороо Украин улсыг Тусгаар улсуудын хамтйн нийгэмлэгээс гаргахаар шийдвэрлэжээ. Паруби бас холбоотон орнууддаа хандан хамтарсан цэргийн сургууль хийх хүсэлт гаргаж байгаа юм байна.
Харин Тусгаар улсуудын хамтын нийгэмлэгийн орнуудын хүрээлэнгийн захирлын орлогч Михаил Жарихина энэ шийдвэрийг эрүүл ухаанаас хол хэтэрхий сэтгэлийн хөдөлгөөнөөр шийдсэн зүйл гэж буруушаасан байна.
“Ганцхан өдөр л ийм шийдвэр гаргаж болохгүй л дээ. Удаан хугацаанд их ажил хийх ёстой. Миний бодлоор бол энэ хүмүүс сэтгэцийн хувьд хэвийн биш байх” гэж шинжээч хэлсэн байна.