ОХУ-ын Чита хотын төвд 2,5 сая рублиэр “Шинэ орос”-ын хөшөө босгосон байна. Зөвлөлт гүрэн тарсны дараа баяжсан “Шинэ орос”-уудын нийтлэг төрхийг харуулсан, сандал дээр сууж байгаа их үнэтэй хүзүүний зүүлт, том бөгжтэй энэ эр  жинсэн өмд, хүрэмтэй гэнэ.

Хөшөөг бүтээгчдийн сэтгэмжээр бол хэн дуртай нь түүний дэргэд суун зургаа татуулж болохоор бодож бүтээжээ. “Бидэнд албан ёсны, нэр эзэнтэй хөшөө баримал хангалттай байна. Одоо харин Чита хотыг бодит байдлаар, жинхнээр нь харуулсан бүтээлээр чимэх цаг болсон. “Шинэ орос”-ын энэ дүр бол манай соёлын нэг хэсэг. Яагаад гэхээр “Шинэ орос” өнөөдөр олон тооны кино, онигооны баатар болоод байгаа. 1990-ээд онд Оросын ажил хэрэгч бараг бүх хүн алтан зүүлт, бугуйвч зүүж, улаан ягаан хүрэм өмсч байсан шүү дээ” гэж уран барималч Бажин хэлжээ.