Японы Кумамото мужийн эрх баригчид нутгийн нэгэн ферм дээр шувууны ханиад илэрснээс болж нийт 100 мянга гаруй тахиа устгалд оруулахаар болсон тухай тус улсын хэвлэлүүд мэдээлж байна. Хүнд халдах аюултай энэ вирусыг анх Тараги хотын шувууны фермээс илрүүлжээ. Учир битүүлгээр үхсэн 270 тахианд мэргэжилтнүүд шинжилгээ хийгээд үхлийн шалтгаан нь шувууны ханиад болохыг тогтоосон аж. Үүний дараагаар тус фермийг тойрсон гурван км-ийн цээрийн бүс тогтоож, мужаас шувууны мах гаргахыг хоригложээ. Өндөр хөгжилтэй орнуудад гол төлөв энэ мэт өргөн хүрээтэй устгал явуулсны дараагаар фермийн эздэд тодорхой хэмжээний нөхөн төлбөр олгодог.