Өмнөд Солонгосын Ерөнхий сайд Чун Хон Вон Севол усан онгоцны хэрэгт хариуцлага хүлээн, суудлаасаа огцорлоо. Тэрээр огцрох болсон тухайгаа телевизээр мэдэгдэхдээ “Одоо хүртэл сураггүй байгаа хохирогчдын гэр бүлийнхний уйлан гашуудах чимээ шөнө хүртэл сонсогдож байна” гээд “Ийм осол гарахаас урьдчилан сэргийлэхээс эхлээд осол гарсны дараа эртхэн арга хэмжээ авах хүртэл олон алдаа гаргасныхаа төлөө Засгийн газрынхаа өмнөөс уучлал гуйж байна. Засгийн газрыг тэргүүлж буй хүний хувьд хариуцлагаа хүлээж огцрох нь зөв гэж бодож байна. Манай нийгмийн өнцөг булан бүрт зүй бус, хариуцлагагүй байдал оршсоор байна. Эртнээс улбаатай энэ алдаа дутагдлыг энэ удаагийн явдлаар засч залруулж, дахин хэзээ ч бүү давтагдаасай гэж хүсч байна” хэмээн мэдэгджээ.

Ерөнхий сайд Чун Хон Вон онгоц живсний маргааш ослын газар ирж, хохирогчдын ар гэрийнхэнтэй уулзахад л албаны хүмүүс маш хариуцлагагүй,хойрго ажиллаж байна хэмээн уур бухимдлаа илэрхийлж, Ерөнхий сайд руу ус хүртэл цацаж байсан юм. Нийтдээ 476 зорчигчтой явсан Севол онгоцноос одоогоор 183 хүний цогцсыг л гаргаж аваад байгаа юм. Хамгийн сүүлд онгоцны нэг өрөөнөөс 48 хүүхдийн цогцсыг гаргаж авсан бөгөөд тэд бүгдээрээ аврах хантааз өмссөн байжээ. Ийнхүү сураггүй хэмээн анх бүртгэгдээд байсан 200 гаруй зорчигчид бүгд амьд үрэгдсэн нь тодорхой болсон бөгөөд одоо цогцсыг нь гаргаж авахад хамаг анхаарлаа тавьж байна.  Харин хөлгийн багийнхныг бүгдийг нь хэрэгт холбогдуулан шалгаж байгаа юм.