Малайзын Тээврийн сайдын үүрэг гүйцэтгэгч Хишамуддин Хусейн өнгөрсөн гуравдугаар сарын 8-ны шөнөөр сураггүй алга болсон Боинг-777 200 онгоцыг эрэх ажлаа үргэлжлүүлнэ гэж мэдэгдлээ. Тэрээр “Ийм хүсэлтийг Хятад, Австрали, болон АСЕАН-ы гишүүн орнууд, манай ерөнхий сайд ч гэсэн гаргаж байгаа. Эрлийн энэ ажиллагаа тун хүнд ажил, гэхдээ бид нөхдийн дэмжлэгтэйгээр үргэлжлүүүлэх болно” гэж хэлсэн байна.
Үүний өмнөх хугацаанд энэ онгоцыг эрэх ажиллагаанд Малайзын Засгийн газар 27,6 сая малайз рингг буюу 8,6 сая доллар зарцуулсан гэж мэдээлсэн юм.
Малайзын иргэний агаарын тээврийн Malaysia Airlines компанийн Боинг онгоц 239 зорчигтойгоор гуравдугаар сарын 8-нд Куала-Лумпураас Бээжин чиглэж нисээд хоёр цагийн дараа радараас гарч сураггүй болсон юм. Гуравдугаар сарын 24-нд Малайзын ерөнхий сайд Нажиб Разак энэ онгоцыг Энэтхэгийн далайд унаж осолдсон, багийн гишүүд болон зорчигчдоос нэг ч хүн амьд үлдээгүй гэж албан ёсоор мэдэгдсэн юм.