Украины ерөнхийлөгч байсан Леонид Кравчук, Леонид Кучма, Виктор Ющенко  нар ОХУ-ын ерөнхийлөгч Владимир Путинд ил захидал бичиж Украин улсад түрэмгийлэл үйлдэхээ зогсоож, яриа хэлэлцээрийн үйл явцад шилжихийг хүссэн байна.
“Бид Оросын ерөнхийлөгч Владимир Путинд ил захидал илгээж түрэмгийллээ зогсоохыг хүссэн. Украин яриа хэлэлцээр хийхэд бэлэн байна” гэж Украины анхны ерөнхийлөгч Леонид Кравчук сэтгүүлчдэд мэдэгдсэн байна. Түүнийхээр бол улс орондоо энхтайван тогтоохоор өнөөгийн ерөнхийлөгч Петр Порошенкогийн боловсруулсан энхийн төлөвлөгөөг бодит ажил болгох нь чухал байгаа гэнэ. “Бид Путинаас манай улсын дотоод хэрэгт оролцохоо зогсоохыг хүссэн” гэж хэлснийг нь “Интерфакс-Украина” дамжуулжээ.
Леонид Кучма бас өмнөх гурван ерөнхийлөгчийн үндсэн зорилго бол энэ хүнд цагт өнөөгийн ерөнхийлөгч Петр Порошенког дэмжих явдал гэсэн байна.
“Миний харж байгаагаар бол өнөөдөр Украин улс байх уу, үгүй юу гэдэг хамгийн гол асуулт болоод байна” гэж тэр хэлжээ.
Леонид Кучма бас Путины оролцоогүйгээр украины энхийн ямар ч төлөвлөгөө бодит зүйл болж чадахгүй, ийм ч болохоор гурван ерөнхийлөгч ОХУ-ын төрийн тэргүүнд хандахаар шийдсэн нь энэ гэсэн байна.  
Харин ерөнхийлөгч асан Виктор Ющенко энэ тухайд “Өнөөдөр Украины эсрэг зарлаагүй дайн болж байна. Тэгэхээр өнөөгийн ерөнхийлөгчийг дэмжиж түүний  дэвшүүлсэн энхийн төлөвлөгөөг ажил болгох хэрэгтэй байна” гэжээ.
Өмнөх энэ гурван ерөнхийлөгч хамгийн эхлээд Киевт болж байсан майдан жагсаалын талаар хамтран мэдэгдэл гаргаж байсан юм. Хамгийн сүүлд энэ гурван экс-ерөнхийлөгч Барууны орнуудад хандаж Оросын эсрэг хориг арга хэмжээ аваач ээ хэмээн хүссэн юм.
Харин ОХУ-ын ерөнхийлөгч Путин Украинд явуулж байгаа байлдааны ажиллагаагаа зогсоохгүй гэдгээ өнгөрсөн ням  гаригт баталсан байна гэжээ.