“Монгол уран бүтээл” үндэсний хөтөлбөр хэрэгжүүлэх арга хэмжээний төлөвлөгөөг жил бүр боловсруулан баталж, хяналт тавьж ажиллахыг Соёл, спорт, аялал жуулчлалын сайд Ц.Оюунгэрэлд даалгав.
Энэ хөтөлбөр иргэдийн эрэлт хэрэгцээнд нийцсэн урлагийн төрөл болох кино, уран зохиол, хөгжим, хөгжмийн чимэглэлийн уран бүтээл түлхүү туурвиж, тэдгээрийг цахим хэлбэрт хувирган нийтийн хүртээл болгох, мэдээллийн хэрэгслийг үндэсний агуулгаар баяжуулж, олон улсын хэмжээнд сурталчлах, үндэсний соёлын дархлаа бэхжүүлэх зэрэг үйл ажиллагааг хангах аж. Хөтөлбөрийн хүрээнд архив, хувь хүнд хадгалагдаж буй Монголын үндэсний уран бүтээлийг сэргээж уран бүтээлийн урын сангаа баяжуулахаар төлөвлөжээ. Хөтөлбөрт зориулж жил бүр 10 тэрбум төгрөг зарцуулж байхаар болсон байна. Үндэсний соёл, уламжлалаа хойч үедээ өвлүүлэн уламжлуулах, түүхээ судлах бололцоог нэмэгдүүлэх, төрийн болон олон нийтийн зүгээс дэмжлэг туслалцаа авах, уран бүтээлчдийн ур чадвар, үндэсний агуулгатай уран бүтээлийн тоо, чанарт ахиц гарч, урын сан баяжин, соёл урлагийг тогтвортой санхүүжүүлэх боломж бүрдэнэ гэж үзжээ.