Америкийн найруулагч Уильям Ханна, Жозеф Барбер нарын  70 гаруй жилийн өнмөн бүтээсэн “Том Жерри хоёр” хүүхэлдэйн киног телевизийн Amazon Prime Instant Video интернет суваг үзүүлэхдээ энэ киноны зарим  хэсэгт арьсны үзлээр гадуурхах хандлага байгаа хэмээн анхааруулга хавсаргажээ.

Дэлхий дахины хүүхэд байтугай насанд хүрэгсдийн сонирхлыг татдаг муур хулгана хоёрын зөрчилдөөний тухай энэ гайхамшигт кинонд гэрийн ажилчин хар арьст эмэгтэйг дүрсэлсэн нь ийм буруутгал хүлээхэд хүргэжээ.
Харин соёлын асуудлаарх тоймч, нийгмийн ухааны профессор Фрэнк Фуреди үүнийг ухаангүй явдал гээд энэ бол АНУ-ын соёлын амьдралд цензур дэлгэрэх гэж байгаагийн нэг илрэл гэсэн байна.

                                Найруулагч Уильям Ханна, Жозеф Барбер нар

“Том Жерри хоёр”-ын анхны кино 1940 онд гарч нийтдээ 100 гаруй анги гарсан нь “Оскар”-ын шагнал долоон удаа хүртээд байгаа юм.
Энэ киног арьсны өнгөөр ялгаварлах явдлыг үзүүлсэн гэсэн шүүмжлэл анх удаа ч гарч байгаа юм биш. 1960-аад онд америкийн телевиз зарим ангийг нь үзүүлэхдээ редакторлан засварлаж  байсан удаатай.
Бас энэ кинонд гол баатрууд нь тамхи татаж байгааг шүүмжилж сүүлийн ангиудаас нь зарим хэсгийг хасч байжээ.