Аргентинаас гаралтай, хурц шийдэмгий хөдөлгөөнтэй танго бүжгийг сонгодог бүжигтэй хослуулсан "Төгсгөлгүй" танго балетын нээлт өнөөдөр УДБЭТ-ын тайзнаа болно.

Өнгөрсөн хавар тус театрынхан Австри улсаас танго, вальс бүжгийн багш урьж 14 хоногийн сургалт зохион байгуулж бэлтгэл хийжээ.

Энэ балетын хөгжмийг  хөгжмийн залуу зохиолч Х.Алтангэрэл бичиж, УДБЭТ-ын гоцлооч Э.Эрдэнэжаргал дэглэн найруулжээ. Ерөнхий зураачаар Г.Ганбаатар, хувцасны зураачаар Г.Оюун ажиллаж, тус театрын ерөнхий балетмейстер Д.Дашлхагва тэдэнд зөвлөж буй. Симфони найрал хөгжмийг Ц.Мөнхболд удирдаж, гол дүрүүдэд Б.Саруул, О.Анужин, М.Од, А.Эрдэнэболд, Б.Пүрэв-Очир, А.Билгүдэ нар тоглоно.

Энэ зууны Монгол Улсын нийслэл хотын амьдрал, мөн төсөөлөлдөө бий болгосон "Урлагийн гудамж"-ны тухай энэхүү бүтээлд өгүүлэх юм байна.