Италийн унаж байгаа Пизанийн цамхгийг хэн бүхэн мэднэ. Унахад бэлэн болж байгаа нь соёлт хүн төрөлхтний сэтгэлийг зовоож, унахыг нь хэрхэн зогсоох вэ хэмээн төсөл хөтөлбөр хэрэгжүүлж байгаа ч унаж байгаагаараа улам алдаршиж аялагч жуулчдын сонирхлыг татсаар байгаа цамхаг. Гэтэл ийн хазайж унахад бэлэн болоод байгаа хуучны дурсаглт барилга нэг биш байдаг байна. Манай гариг дээр анх барьснаасаа хамгийн их хазайгаад байгаа ч хэдэн зууны туршид газрын татах хүчний эсрэг “тэмцэн” босоо хэвээр байгаа  7 гайхамшигт цамхгийг танилцуулж байна.

1.    Мэдээж хамгийн алдартай нь Италид 1360 онд барьсан Пизанийн цамхаг. Италийн уран барилгын бэлгэ тэмдэг болсон энэ цамхаг нийтдээ 294 шаттай, хамгийн нам талдаа өндөр нь 55,8 метр бол өндөр талдаа 56,7 метр. Хазайхыг нь зогсоох гэж олон арга хэмжээ авсаар байгаа ч ийм байдлаар 200 орчим жил тогтоно гэж үзэж байгаа.

2.    Унаж байгаа цамхгуудын дотроос хамгийн өндөр нь Италийн умард нутгийн Болонье дэх Азинеллийн цамхаг. 97 метр өндөр энэ цамхаг 1,3 градус хазайгаад байгаа. Дэргэд нь яг адил  хэлбэртэй цамхаг бас бий. Гурван ч удаа үүнийг богиносгож одоо 48 метр болгосон.

3.    Орост бас өөрийн гэсэн унаж байгаа цамхаг бий. Екатеринбургээс холгүй Невьянск гэдэг хуучны хотод тэртээ 1732 онд гэгээнтэн Акинфий Демидовын бариулсан энэ цамхаг 1,85 метр хазайгаад байгаа. Энэ угаасаа их нууцлаг цамхаг. Зургадгуур давхарт нь гэхэд л чагнах танхим гэгч бий. Нэг буланд нь суусан хүн шивнэхэд нөгөө буланд нь дуулддаг гэнэ

4.    Оросын өөр нэг унаж байгаа цамхаг бол Татарстаны хэрэмд байдаг Сююмбикийн цамхаг мөн л 1,9 метр хазайсан. Долоон длавхар энэ цамхаг он цагийн уртад харуулын цамхгийн үүрэг гүйцэтгэсэн.

5.    Украины Их Лаврын хонхот цамхаг бас л анх барьснаасаа хажуу тийшээ хазайсан барилга. 1731-1745 онд уран браилгач Готфрид Иоганн Шеделийн  бариулсан гэдэг энэ цамхаг зүүн урд зүг рүү 62 см хэлтийжээ. Цамхаг нийтдээ 96,5 метр өндөр.

6.    Умард Ирландын Белфаст хот дахь 34 метр өндөр Альбертийн цамхгийг XIX  зууны дунд үед хан хүү Альберт, хатан хаан Виктория нарын дурсгалд зориулан босгосон. Барилгыг арслангуудын дүрсээр чимж, төвд нь Альбертийн хөшөө босгон, франц, италийн готик хийцээр барьсан энэ цамхаг лондонгийн Биг-Бен цамхгийн яг хуулбар.

7.    Хятадын 47 метр Хуцю цамхаг бол барьж эхэлсэн цагаасаа хойш мянга орчим жил насалж байгаа браилга. Сужоу хотын бэлгэдэл энэ цамхаг хотын хамгийн эртний уран барилгад зүй ёсоор орно.