Өнгөрсөн онд хүмүүс өгзгөө хэрхэн хөдөлгөж сурах аргыг л мэдэхийг хамгийн их хүссэн. Тэгвэл энэ онд хүмүүс “Эбола” вирусийн халдвар авсан эсэхээ мэдэхийг хамгийн их хүсчээ.

Дэлхийн нийтийн хамгийн их мэдээлэл авахыг хүссэн зүйлсийн жагсаалтыг “Google” уламжлал ёсоор гаргажээ. “Apple”, “Facebook” болон бусад компани ч ийм жагсаалт гаргадаг ч тэдгээр нь хүмүүс нийгмийн сүлжээгээр юу худалдаж авсан, ямар мэдээлэл тавьсан зэргийг л харуулдаг юм.

Харин “Google”-ийн хайлтын түүх илүү бодитой, шударга, заримдаа ичмээр, бид бүхэн юунд үнэхээр хамгийн их анхаарлаа хандуулдаг болохыг харуулж байна.

2014 онд дэлхий нийтээрээ АНУ-ын алдарт жүжигчин Робин Уильямс нас барсанд хамгийн их харамсан гашуудаж, хөл бөмбөгийн ДАШТ-ийг үзэн сэтгэл нь хөдөлж, “Эбола”-гийн тархалтад хамгийн их түгшицгээжээ.

Эдгээрээс гадна энэ онд “Google”-ээр “МН370” дугаарын нислэг үйлдэж яваад сураггүй болсон Малайзын иргэний агаарын тээврийн онгоц, ALS буюу хүний булчингийн үйл ажиллагааг саармагжуулж улмаар үхэлд хүргэдэг, вирусийн гаралтай хүнд өвчин туссан хүмүүсийн эмчилгээнд зориулан хандив цуглуулах зорилго бүхий “Ice Bucket Challenge” мөстэй ус толгой дээрээсээ асгуулах сорилт, ухаалаг гар утасны донтуулдаг “Flappy Bird” тоглоом зэргийн талаарх мэдээллийг хүмүүс хамгийн их хайсан байна.