Экс Ерөнхий сайд Н.Алтанхуягийг улстөрч гэж мэдэхээс гэрэл зурагчин гэх хүн цөөн. Сүүлийн арав гаруй жил Монгол орны байгалийн үзэсгэлэнт газруудыг гэрэл зурагт өөрийнхөө харсан өнцгөөр буулгаж буй тэрээр “Шигтгээ мэт миний эх орон” фото цомгоо өчигдөр үзэгч олонд дэлгэлээ. “Туушин” зочид буудалд болсон тус цомгийн нээлтэд гэрэл зураг сонирхогчид болоод гадаад дотоодын улс төр, урлаг соёлын төлөөлөл хүрэлцэн ирсэн юм. Монгол орны байгалийн үзэсгэлэнт өнгө төрх бүхий 400 орчим гэрэл зураг багтсан тус цомгийг Герман улсад хэвлүүлсэн аж. “Шигтгээ мэт миний эх орон” буюу “My country like mosice” гэх тус цомог өнгөрсөн сарын 15-нд хэвлэлтээс гарч өчигдрөөс “amazon.com” тэргүүтэй олон улсын цахим худалдааны томоохон сайтаар худалдаалагдаж эхэллээ.
Түүний гэрэл зургийн анхны цомгийг Монголыг дэлхийд таниулах том сурталчилгаа болж чадна хэмээн зарим гэрэл зурагчид өндрөөр үнэлж байгаа аж.
Тэрээр өмнө нь “Оргил өөд” нэртэй номоо хэвлүүлсэн нь Германы хэвлэлийн компаниудын дунд зохиогддог шилдэг бүтээлийн уралдаанд нэр дэвшээд байгаа аж. Тус шалгаруулалтад Н.Алтанхуягийн “Оргил өөд” ном ардчиллын төлөөх шилдэг бүтээлийн номинацид өрсөлдөж байна.