“Хөх тэнгэр” хамтлаг үүсэн байгуулагдсаны 25 жилийн ойг тохиолдуулан хамтлагийнхан анхны бүрэлдэхүүнээрээ 20 жилийн дараа дахин тайзнаа гарахаар болжээ. Тэд сэтгэлд шингэсэн аялгуут дуунуудаа энэ сарын 19-нд “Crocus event hall”-д  эгшиглүүлэхээр бэлтгэлээ базааж байгаа аж. Тоглолтод зууны манлай дуучин Монгол Улсын гавьяат жүжигчин Б.Сарантуяа,  Б.Дашдондог, дуучин Н.Ганхуяг, Б.Цогоо, урлагийн гавьяат зүтгэлтэн хөгжимчин, хөгжмийн зохиолч Г.Энхбаяр, Г.Пүрэвдорж, хамтлагийн ахлагч Н.Ганбат, гитарчин, ая зохиогч Д.Өлзий-Орших, Г.Буян-Өлзий, хөгжимчин Н.Халиун, бөмбөрчин Ж.Золбоо нар оролцон ая дуугаа өргөх гэнэ.
Ганц үдэш болох тоглолтод тус хамтлагийн шилдэг дуунууд дуулагдахаас гадна 90-ээд оны диско үдэшлэгт ирсэн мэт сэтгэгдэл төрүүлэх болно гэдгийг зохион байгуулагчид нь дуулгаж байна билээ.