Төрийн хошой шагналт, Ардын жүжигчин Н.Жанцанноровын бүтээлүүдийг сорчлон дээжилсэн "Монгол аялгуу" хамтарсан тоглолт энэ сарын 24-нд Токио хотноо эгшиглэх гэж байна.Тал шигээ уужим, тэнгэр шигээ цэлмэг монгол  хүний ур ухаан, авьяас билгээр амилсан аялгуу тансаг монгол хөгжим арлын япончуудад гурав дахиа хүрэх гэж буй нь энэ. Монгол-Японы уран бүтээлчдийн хамтарсан тоглолтыг “Дэлхийн морин хуурын холбоо”, “Жанцанноров сан”, Монгол улсаас Япон улсад суугаа Элчин сайдын яамнаас ивээн тэтгэж зохион байгуулах аж. Монголын хөгжмийн урлагийн нэрт төлөөлөгч ийнхүү яруу тансаг Монгол хөгжмийн гайхамшгийг Японы үзэгч, сонсогчдод мэдрүүлж, эх орныхоо соёлын өвийг дэлхийн тайзнаас сурталчилах юм байна.