Монгол Улсын Морин хуурын чуулга энэ сарын 27, 28-нд Тусгаар тогтнолын ордны концертын танхимд “Шилдэг бүтээлийн дээжис” тоглолтоо толилуулахаар зэхжээ. Энэхүү тоглолтыг морин хуурч, удирдаач, хөгжмийн зохиолч СТА Д.Түвшинсайхан удирдах бөгөөд тус чуулгын үе үеийн сор болсон шилдэг бүтээлүүд хоёр үдшийн турш эгшиглэх аж. Дэлхийд хосгүй морин хуурын хөгөөр сонороо мялаан, гэр бүл, найз нөхөдтэйгээ нэгэн үдшийг мартагдахааргүй өнгөрөөхийг хүссэн хэн бүхэнд нээлттэй энэхүү тоглолтын бүх орлогыг “Хүн Бүр Сурах Эрхтэй” оюутны тэтгэлэгт хөтөлбөрийн санхүүжилтэд шууд хандивлахаар болсон байна.