Сүүлийн хэдэн долоо хоногийн дотор дотроо 22 хүний цогцостой загасдын 12 модон завь японы эрэгт ойртож ирлээ гэж Японы эргийн хамгаалалтын алба мэдээлснийг Рейтер агентлаг дамжуулжээ. Мөрдөн шалгасан албан ёсны дүн гараагүй ч энэ бүх завь Умард Солонгосын загасчдынх гэсэн таамаг гаргаж байна. Нэг завь нь бүр Умард Солонгосын армийнх байжээ. Энэ моторт завинуудад чиглэл заах төхөөрөг байхгүй байснаас үзэхэд загасчид задгай далайд чиглэлээ алдан төөрч даарч, өлсч үхсэн бололтой гэсэн байна.
Умард Солонгосоос дүрвэж ирсэн хүмүүсийн яриагаар бол БНАСАУ-ын удирдагч Ким Чен Ун загасны аж ахуй нь гадаад валютын эх үүсвэрээс гадна газар тариаланг бодвол байгалиас хараат биш, хүнс бэлтгэх хамгийн зохистой арга хэлбэр гэж мэдэгджээ. Ийм болохоор загасчид төдийгүй, тэнгисийн цэргийнхэн ч аль болох их загас барихыг мэрийдэг болсон гэнэ. Харамсалтай нь тэд эргээс холдсоор зүг чигээ алдан, шатахуунгүй болж улмаар амь алддаг болсон бололтой.