Оросын ерөнхийлөгч Владимир Путин, Туркийн тэргүүн Тайип Эрдоган хоёр ижилдээ ижил, улстөрийн бодлогоороо  ч, сэтгэцийн байдлаараа ч ихэр гэж болно хэмээн сүүлийн үед болж байгаа үйл явдалтай холбогдуулан францын Libération сонинд бичжээ.
Чухамдаа энэ нь л Сирийн хямралын асуудлаар тэднийг бие биеийнх нь эсрэг тавьж “энэ хоёр дарангуйлагчийг” бүр зөрчилдөөнд хүргээд эсрэг тэсрэг байрлалд оруулаад байгаа юм гэсэн байна.
“Улс төрийн талаас нь  ч, сэтгэцийн талаас нь ч харахад  тэд яг л ихэр гэсэн үг” гэж Libération-ы сэтгүүлч Марк Семо бичжээ. Тэд өнөөдөр хэдийгээр бие биедээ дайсагналцаж байгаа ч нэгэн цагт “бие биенээдээ тэмүүлсэн  найзууд л байсан шүү дээ” гэж зохиогч бичсэн байна.

“Хаан”, “султан” засгийн эрхийг ганцаараа эзэгнэж, бүхнийг өөрөө шийддэгээрээ адилхан гээд “Бурхан тэдэнд өнгөрсөн агуу байдал руу буцах гэсэн тийм шунал номлосон” гэжээ.
Сэтгүүлчийн бичсэнээр бол тэд ямар ч шүүмжлэлийг тэвчдэггүй, сөрөг хүчнээ үзэн ядаж, сонгогчдынхоо сэтгэлзүйд үндэсний үзэл төлөвшүүлэхдээ цэргийн дарангуйлал ашиглах дуртай хүмүүс гэсэн байна.
Үүндээ  Марк Семо оросын удирдагчийг бөмбөгдөгч онгоц нь сөнөсний төлөө эсэргүүцлээ илэрхийлж байгаа байдал, Туркийн төрийн тэргүүний улсынх нь агаарын хилийг зөрчсөний төлөө гаргаж байгаа авир зэргийг жишээ болгосон байна.
АНУ-ын ерөнхийлөгч Барак Обама энэ хоёр орны харилцааны хурцадмал байдлыг намжаахыг оролдож байгаа ч ахиц гарахгүй байна гэж зохиогч бичээд энэ бүх хямрал, зөрчилдөөний гол зангилаа нь  Сирийн хямралыг ашиглах гэсэн хоёр орны ашиг сонирхлоос үүдэлтэй гэжээ.
Кремлийн суртал нэвтрүүлгийн гол зорилго нь Турк ч юм уу, Саудын Араб, Франц гээд Башар Асадыг Сирийн тэргүүнээр үлдээхгүй хэмээн сирийн сөрөг хүчнийг дэмжиж байгаа бүхий л улс орон, тоглогчдыг замаасаа зайлуулах явдал гэж болно. Нөгөө талаас Путин Башар Асадыг хэнээр солихоо бас мэдэхгүй байгаа юм. Гэхдээ тэр бас хуучин Зөвлөлт холбоот улсын орон зайд, нэг удаа бүр Орост болсон аюултай нөхцөл байдлыг давтахыг хүсэхгүй байгаа хэмээн Марк Семо Libération сонинд  бичсэн өгүүлэлдээ дурджээ.