“Миний бүтээлүүдийн утга санаа нь мөнх бусын тухай болон дархлаа гэсэн санаан дээр тогтоно. Амьдрал дээрх юмс хэдийгээр түр зуурын чанартай ч, бүх зүйлс оршин тогтнох гэж тэмүүлж байдаг. Үүний нууц нь дархлаа бөгөөд, энэ нь өсөн дэвжихтэй адил үнэ цэнэтэй юм" хэмээн өгүүлэх Э.Жанцанхоролын “Холимог дархлаа” уран бүтээлийн үзэсгэлэн Занабазарын нэрэм­жит Дүрслэх урлагийн музейд нээлтээ хийгээд удаагүй байгаа ч хүмүүсийн хөл тасрахгүй байна. Энэхүү үзэсгэлэнг Монголын урлагийн зөвлөл Монголын орчин цагийн дүрслэх урлагийн авьяаслаг залуу уран бүтээлчдийг гадаад дотоодод таниулан сурталчлах үйл ажиллагааг “Улаан гэр” нүүдлийн галерейгаар дамжуулан хүргэдэг уламж­лалынхаа дагуу зохион байгуулжээ.

Орчин үеийн урлагийн томоохон төлөөлөл Нари Вард (Nari Ward)-ийн шавь болж, АНУ-ын Нью-Йорк хотын Хантэр (Hunter) коллежид элсэн орж суралцсан Э.Жанцанхорол нь холимог буюу hybrid баримлын төрлөөр бүтээлүүдээ хийжээ. Hybrid бүтээл нь сүүлийн үед эрчтэй хөгжиж буй орчин үеийн урлагийн төрөл юм. Түүний уран бүтээлийн урлангаар аялахад эргэн тойрон хэнд ч хэрэггүй эд зүйлс болох картон цаас, хайрцаг, эвэр, төмөр, банз, хавтанг хэрхэн урлагийн бүтээл болгосныг нь та харж болно. Энэхүү үзэсгэлэн энэ сарын 23 хүртэл хэн бүхэнд нээлттэй юм байна.