“The Beatles” хамтлагийг үүсгэн байгуулагчдын нэг болох Жон Ленноны “Rickenbacker” гитар АНУ-д зохион байгуулсан дуудлага худалдааны үеэр 910 мянган долларын үнэ хүрч зарагдлаа гэж  “Julien"s Auctions” ордон мэдээлжээ.

Жон Леннон уг гитарыг хамтлагийнхаа бөмбөрчин Ринго Старрт бэлэглэж байжээ.

Харин Ринго Старрын “Ludwig Oyster” бөмбөрийн хэрэгсэл 2.2 сая долларын үнэ хүрч зарагдсан байна. Ринго Старрын бөмбөрийг Америк хөл бөмбөгийн "Индианаполис колтс" клубын эзэн Жим Ирсэй худалдан авчээ.

Домогт “The Beatles” хамтлагийн бөмбөрчин Ринго Старр 800 гаруй хөгжмийн зэмсгийг дуудлага худалдаанд тавьсан байна.

Ийм дуудлага худалдаа зохион байгуулах санаачилгыг АНУ-ын хамгийн нэр хүнд бүхий хөгжмийн шагнал болох “Grammy”-гийн музейн ажилтнууд гаргасан гэж өдгөө 75 настай Ринго Старр хэвлэлүүдэд ярилцлага өгөхдөө хэлсэн байна.