Британийн Ерөнхий сайд Дэвид Камерон  цагдаагийнхан болоод тусгай хамгаалалтынханд хандан “Яллахаас илүү хамгаалалт үгүй” гэсэн тактик барин ажил үүргээ гүйцэтгэх зөвшөөрөл олгосон байна. “The Sunday Times”-т мэдээлснээс үзвэл Британийн Ерөнхий сайд “Ард иргэдээ Парист болсон шиг халдлагад өртүүлэхгүй байх, эрсдэлээс хамгаалах шийдвэрийг цагдаагийнхан  ганцхан хоромын дотор гаргах чадвартай байх ёстой. Тиймээс цагдаагийн албан хаагч гаргасан шийдвэрийг бид хуулийн дагуу олон нийтийн аюулгүй байдлыг хангахын төлөө хийсэн үйлдэл гэдэгт итгэл төгс байж, хүндэтгэн хүлээн авах хэрэгтэй. Бидний амьдрал аюулгүй байгаа гэдэгт итгэх газар өнөөдөр энэ дэлхийд алга” хэмээн хэлсэн байна. Гэвч Ерөнхий сайдын энэ шийдвэр зарим нэгэн улстөрчид хийгээд ард иргэдийн эсэргүүцэлтэй тулж буй. Энэхүү шийдвэрийн дагуу цагдаагийнхан  зөвхөн алан хядах ажиллагааны эрсдэлийн үед галт зэвсэг хэрэглээд зогсохгүй гэмт хэрэгтний эсрэг ч ашиглах бүрэн эрхтэй болж буй юм. Цагдаагийн ажилтнуудыг буу, сумаар бүрэн хангахын тулд Засгийн газраас энэ долоо хоногт 34 сая фунт стерлингийг гаргахаар болжээ. Мөн цахилгаан буугаар ч Лондон хотын цагдаагийн ажилтнуудыг хангахаар төлөвлөсөн гэнэ.  Энэ бууны ачаар л өнгөрсөн 5-нд метроны буудалд олон нийтэд халдсан этгээдийг аюулгүй болгож баривчилсан юм.