Монголын зохиолчдын эвлэлийн хорооноос жил бүр уламжлал болгон зохион байгуулж, оны шилдэг яруу найрагчийг тодруулдаг “Болор цом” наадмын тов тодорхой болжээ. Тодруулбал, ирэх сарын 2-нд нийслэлд зохиогдохоор болсон байна. Энэ жил зохиолч Д.Сэнгээгийн 100, их зохиолч Д.Нацагдоржийн 110 гээд олон тэгш ой тохиож буй. Тиймээс насны ой нь тохиож байгаа хүмүүсээ алдаршуулах зорилгоор энэ удаагийн “Болор цом”, “Алтан-Өд”, “Утгын чимэг” наадмыг тэдний нэрэмжит болгохоор  төлөвлөжээ. Дашрамд сонирхуулахад, “Алтан-Өд” наадам Монголын зохиолчдын эвлэл гал голомтоо үүсгэн байгуулсан өдөр буюу энэ сарын 9-нд болох бол “Утгын чимэг” наадмыг гуравдугаар сард зохион байгуулахаар төлөвлөжээ.
Энэ удаагийн “Алтан-Өд” наадмыг долоон төрлөөр шалгаруулахаас гадна Д.Нацагдоржийн нэрэмжит шагнал, Монголын зохиолчдын эвлэлийн шагнал, Г.Сэр-Одын нэрэмжит шагнал, “Утга зохиолын төлөө гээд Монголын зохиолчдын эвлэлээс тодруулдаг шагналын эздийг мөн тодруулах юм байна.