Асар хурдтай хөгжиж буй технологийн дэвшилтэй хүн төрөлхтөн хөл нийлүүлэхэд хэцүү болжээ. Саяхан олон нийтийн сүлжээний хамгийн том нэгдэл фэйсбүүкээс 360 градусын өнцгөөр дүрс бичлэг хийх боломжтой камер танилцуулж байсан. Арав гаруй камерын цогцоос бүтэх эл камер овор хэмжээний хувьд харьцангуй том, суурин камертай адил хөл ашиглан бичих боломжтой. Тэгвэл фэйсбүүкийн нээлтийг илүү боловсронгуй болгож “gopro” камертай ижил зориулалтаар ашиглаж болох аппаратыг “Nikon” компанийн инженерүүд зохион бүтээжээ. Нээлтээ хийгээд удаагүй уг камер 360 хэмийн орчныг 4K нягтаршилтай бичиж, зураг авахын дээр 30 метрийн гүнд усны даралт тэсвэрлэх чадалтай аж. Аялагч, байгалийн гэрэл зурагчдын анхаарлыг татаж буй шинэ бүтээлийг чичиргээ бууруулагч буюу электрон “VR”-аар тоноглосон нь доргилт бууруулж, илүү тогтвортой бичлэг хийх боломж бүрджээ.