А.АКЭРКЭ

Монгол Улсын гавьяат жүжигчин Б.Сарантуяа дундаршгүй арвин дуунуудаасаа түүвэрлэн нийтдээ 20 цомог сонсогчиддоо өргөн барьсан байдаг. Хамгийн сүүлийн цомог болох “Сэхүүн салхи”-аа үзэгч түмэнд танилцуулахдаа Улаанбаатар хотод VIP тоглолт, мөн Дархан, Эрдэнэт, Хөвсгөл болон өөрийн төрөлх нутаг Төв аймгийн Зуунмодод хүртэл тоглолт хийж олны талархлыг хүлээсэн билээ. Тэгвэл гавьяат жүжигчин маань энэ удаад Швейцарь, Франц, Турк, Норвеги Бельги, Австри зэрэг Европын орноор аялан тоглолт хийхээр болжээ. Уран бүтээлчдийн дундаас үзэгч сонсогчдод хамгийн ойр бөгөөд хамгийн сайн менежменттэй гэдэг түүний тоглолтод охин, хүү хоёроос нь гадна Берлинд амьдардаг дуучин Гэрэл оролцох юм байна. Тоглолтод “Сэхүүн салхи” цомогт багтсан дуунуудаас гадна “Миний сайхан ээж”, “Аав, ээж хоёр минь”, “Содура”, “Миний аз жаргалын дуу” ч багтжээ.

Дашрамд сонирхуулахад, Найрал дууны клуб байгуулах ажлынхаа  хажуугаар Зууны манлай дуучин маань урлагт хүчин зүтгэсэн 30 жилийнхээ ойд зориулж баримтат кино хийж байгаагаас гадна ном бичиж байгаа гэнэ шүү. Харин өнөөдрөөс эхлэх тоглолт нь энэ сарын 24-нд өндөрлөх бөгөөд гавьяат маань сар шинийн өмнөхөн эх орондоо ирэхээр төлөвлөжээ.