АНУ-ын зүүн эргээр болсон цасан шуурганы нийт хохирлыг олон улсын Moody`s агентлагийн шинжээчид гурван тэрбум ам.доллар гэж үнэллээ хэмээн CBS News мэдээлж байна. Америкийн зүүн эргийн нутгаар өнгөрсөн долоо хоногийн сүүлээр эхэлсэн цасан шуурга 1900 оноос хойшхи хамгийн хүчтэйд орж байгаа юм. 85 сая хүн амьдарч байгаа энэ нутгуудад шуурганы улмаас нийтийн тээвэр, галт тэрэгний хөдөлгөөн зогсч энэ гамшгаар 37 хүн амь насаа алдаад байна.  
Шуурганы улмаас худалдаа, үйлчилгээ зоогийн газар, тээврийн компаниуд маш их алдагдал хүлээж байгаа бол, агаарын тээврийн арилжааны компаниуд 13 мянган нислэгээ хойшлуулаад байна.

IHS Global Insight-ийн шинжээчид энэ шуурганы учруулсан хохирлыг 500 саяас нэг тэрбум ам.доллар болно гээд эдний төлөөлөгч Крис Кристофер “Шуурганы учруулсан хохирол яг хэдий болохыг одоо бид хэлж чадахгүй, ямар ч байсан хэмжээлэшгүй их” гэсэн байна.