Энэтхэгийн Тхане хотын иргэн 35 настай Ханстил Варакар гэр бүлийн 14 хүнээ хутгалж алаад дараа нь өөрийгөө боож амиа егүүтгэсэн  аймшигт хэрэг гарсан байна. Тус хотод баярын төрөл бүрийн арга хэмжээ зохион байгуулдаг ажилтай Варакерын гэр бүл тийм ч ядуу биш хот, тойрогтоо л чинээлэг айлын тоонд ордог байжээ.
Цагдаагийнхны мэдээлснээр бол бямба гарагийн орой Варекарынх зочин хүлээн авч шуугилдаж байгаад унтацгаасан гэнэ. Шөнийн 02 цагийн үед гэмт этгээд хаалгаа дотроос нь түгжээд эхнэр, найман хүүхдээ, бас гурван дүү бүсгүй, эцэг эхээ унтаж байхад нь хутгалж алаад өөрийгөө дүүжилсэн байна. Гэр бүлийнхнээ хөнөөсөн зэвсэг нь яг өөрийнх нь цогцосны дэргэд байсан гэнэ. Энэ аймшигт гэмт хэргийн тухай энэ гэр бүлээс шархдаж үлдсэн ганц бүсгүй дүүгээс нь хуулийнхан тодорхой мэдсэн байна. Шархадсан бүсгүйн хашгирахыг хөршүүд нь сонсоод гүйж ирсэн ч хаалга нь дотроосоо түгжээтэй байсан болохоор цонхыг нь хагалан орж аймшигт хэргийг ул мөрийг харцгаажээ. Ингээд цагдаа  дуудаж, хуулийнхан ч хүрэлцэн ирсэн байна.
Хутганы шархтай бүсгүйг эмнэлэгт хүргэн тусламж үзүүлж, хэргийг мөрдөн шалгаж эхэлсэн байна. Одоогоор гэмт хэргийн шалтгаан нөхцөл тодорхойгүй байгаа юм байна.