ОХУ-ын Ерөнхийлөгч Владимир Путин Батлан хамгаалахын сайд Сергей Шойгуд энэ гуравдугаар асрын 15-ны өдрөөс эхлэн Сирид байгаа оросын цэрэг зэвсгийг гаргах тушаал өгсөн байна. Тэрээр Гадаад хэргийн сайд Сергей Лавров, Батлан хамгаалахын сайд Сергей Шойгу нартай уулзах үеэрээ ингэж тушаажээ.

“Батлан хамгаалах яам, зэвсэгт хүчний өмнө тавьсан зорилгоо  бүрэн биелүүлсэн гэж үзэж байна. Ийм учраас маргаашаас эхлэн Сирид байгаа манай цэргийн бүлэглэлийн үндсэн хэсгийг гаргаж эхлэх хэрэгтэй” гэж Путин мэдэгджээ.

Орос хүн цөөтэй ч байлдах чадвартай төрөл бүрийн цэрэг  багтсан тийм хүчнийг Сирид богино хугацаанд бүрдүүлж чадсан гэж ОХУ-ын ерөнхийлөгч тэмдэглээд энэ бол энхийг сахиулах үйлсийн эхлэл, мөн зөрчилдөөнтэй байгаа орнуудад сайн жишээ болно гэдэгт итгэж байгаагаа хэлжээ.

Батлан хамгаалахын сайд Сергей Шойгу энэ үеэр Оросын цэргийн нисэх хүчин энэ хугацаанд 2000 орчим зэвсэгт дайчныг устгасан гэж мэдээлсэн  байна.

Хэдийгээр Сириэс цэргээ гаргаж байгаа ч ОХУ тус улсын засгийн газарт зэвсэг, цэргийн техник нийлүүлэх, цэргийн мэргэжилтнүүдийг нь сургах ажлаасаа татгалзахгүй гэж ОХУ-ын Холбооны зөвлөлийн Батлан хамгаалах, аюулгүй байдлын хорооны тэргүүн Виктор Озеров хэлжээ.