Энэ он гарсаар 17 удаагийн ийм мөргөлдөөн болсон тухай Сайд нарын танхимын хуралдааны дараа, Нийгмийн аюулгүй байдлыг сахиулах комиссын тэргүүн Таро Коно хэвлэлийн хурал хийхдээ мэдэгдээд “Нөхцөл байдал бүр аюултай хэмжээнд хүрээд байна” гэжээ.
Япондоо томд орох якуза нарын “Ямагути-гуми” бүлэглэлийн хэсэг гишүүн эндээсээ салж өнгөрсөн оны наймдугаар сард   өөр нэг шинэ “Кобэ ямагути-гуми” гэдэг бүлэглэлд нэгдсэнээс энэ зөрчил эхэлсэн байна. Ингэж гишүүд нь гарсан ч гэсэн  “Ямагути-гуми” бүлэглэл өнөөдрийн байдлаар 14 мянган гишүүнтэй бол, шинэ “Кобэ ямагути-гуми” бүлэглэл нь 6000 орчим гишүүнтэй гэнэ.
“Ямагути-гуми” ямар ч байсан япондоо зохион байгуулалттай гэмт хэргийн хамгийн том бүлэглэл хэвээр, цагдаагийн байгууллагын мэдээгээр мэргэжлийн якуза нарын 46 хувийг өөртөө нэгтгэж байгаа юм байна. Хэвлэлүүд “Ямагути-гуми” бүлэглэлийн гишүүдийн тоог янз бүрээр хэлж байна. Зарим нь 14 мянган гишүүнтэй гэж байгаа бол оросын newsru.com сайт 23 мянган гишүүнтэй гэж бичиж байгаа юм.  
Бүр 1915 онд байгуулагдаж байсан “Ямагути-гуми” бүлэглэл якуза нарын 500 орчим жижиг бүлэглэл, 2500 орчим фирмийг хянадаг гэнэ.
Кобэд толгойлогч нь байдаг энэ бүлэглэл зөвхөн нийт Японоор зогсохгүй АНУ, Азийн орнуудад ажиллагаа зохион байгуулдаг гэдэг.

2015 оны аравдугаар сарын 20-нд японы цагдаагийнхан энэ бүлэглэлийн удирдагчийн нэг Кэнзи Эгути гэгчийг баривчилсан. Энэ бүлэглэлээс гишүүд нь  салан тусгаарлаж гарсны дараахан 2015 оны аравдугаар асрын 1-нд бас цагдпаагийнхан эдний гишүүн 29 хүнийг баривчилж байсан юм.
Японы 47 аймгийн 44-т нь өөрийн салбартай энэ том бүлэглэл 1980 онд бас задарч, нэг хэсэг нь салж явах үеэр бас зөрчил маргаан, бүр зэвсэгт мөргөлдөөн болж 300 гаруй мөргөлдөөний үеэр хүний амь үрэгдэж, олон хүн шархдаж байсан юм байна. Тэр үед “Ямагути-гуми”-ийнхан “Итива-кай” бүлэглэлийнхэнтэй зөрчилдөж байжээ.