Японы шүүхээс  цаазаар авах ял хүлээсэн хоёр гэмт хэрэгтнийг Хуульзүйн сайд Мицухидэ Ивакийн тушаалаар дүүжилж хороолоо хэмээн NHK телевиз мэдээлжээ.
Гэмт хэрэгтэн Сатоси Цуда нь 2009 онд нэгэн гэр бүлийн гурван хүнийг алсан бол хоёр дахь этгээд нь 2006 онд дээрэм хийх үедээ хоёр хүний аминд хүрсэн гэмт хэрэгтэн байжээ.

Япон хамгийн сүүлд өнгөрсөн оны арван хоёрдугаар сард цаазын ял гүйцэтгэсэн бол одоо 120 орчим гэмт хэрэгтэн шүүхээс цаазаар авхуулах ял сонсоод энэ шийдвэрийг гүйцэтгэхийг хүлээж байгаа юм байна. Шүүхээс ял сонсгоод хэдэн жилийг өнгөрүүлдэг ч цаазаар авхуулах хүнд ял гүйцэтгэх өдрийн өглөө л энэ тухай мэдэгддэг гэнэ.

Синзо Абэг Японы ерөнхий сайд болсноос хойш нийтдээ 14 гэмт хэрэгтний  цаазаар авах ялыг гүйцэтгэсэн юм байна.
Олон улсын хүний эрхийг хамгаалах байгууллагын гишүүд Японыг цаазаар авах ялаа болиулахыг уриалдаг ч тус улсын хүн амын 85 хувь нь хуулийн дээд хэмжээ энэ ялыг хэвээр байлгахыг дэмждэг юм байна.