Умард Солонгосын удирдагч Ким Чен Ун ардын армийнхаа их бууны нэгтгэлд зочлох үеэрээ Өмнөд Солонгосын нийслэл Сөүл, Засгийн газрын ордонд цохилт өгөхөд бэлэн байхыг их буучдад уриалсан байна.
Тэрээр их буучдыг Сөүлийн объектуудыг “хайр найргүй устгахад” бэлэн байх ёстой гэжээ. “Бүх цэрэг дайчид жинхэнэ дайчин сэтгэлгээрээр бүрэн хүмүүжсэн байх ёстой. Цэрэг бүр байлдааны өндөржүүлсэн блээн байдалд бэлэн байх хэрэгтэй” гэж Ким Чен Ун цэргүүдэд захьсан байна. 

Хэдэн хоногийн өмнө БНАСАУ Өмнөд Солонгосын ерөнхийлөгчийн засаг захиргааг том калибрын шуурган галын тусламжтайгаар “гал үнстэй хутгаж тэнгист живүүлэхэд” бэлэн байгаагаа мэдэгдсэн юм. Үүний зэрэгцээ умардынхан балластик пуужингаа сайжруулах зорилгоор пуужингийн хатуу түлшт хөдөлгүүр туршсан тухай хэвлэлүүд мэдээлж байна.
Умард Солонгосын цөмийн эрдэмтэд бас нэгдүгээр сарын 6-нд туршсан устөрөгчийн бөмбөгөөр Манхэттенийг устгана хэмээн заналхийлж байгаа юм. Энэ бөмбөгийг турших үеэр магнитудын таван баллын газар хөдлөлийн чирчирхийлэл мэдрэгдсэн гэж АНУ, Өмнөд Солонгосын чичирхийлэл судлалын төвүүд баатлж байгаа юм.