Ирак даяар болсон халдлага, дэлбэрэлтүүдийн улмаас наад зах нь 25 хүн амиа алдаж, 60 хүн шархадсан байна. Бөмбөг дэлбэлэх хэд хэдэн халдлага үйлдсэнээ “Лалын улс” бүлэглэл цахим хуудсандаа мэдээлжээ.

Иракийн өмнөд нутгийн Басра хотод өчигдөр тэсрэх бөмбөгтэй машин дэлбэрч, наад зах нь таван хүн амиа алдсан тухай “Ройтерс” агентлаг мэдээлсэн байна. Уг дэлбэрэлтийн үеэр Насирия хотын ресторанд амиа золиослогч дахин халдлага үйлджээ. Мөн Багдад хотын захын дүүрэг дэх аюулгүй байдлыг хянах цэгт дэлбэрэлт болжээ. Ингэснээр даваа гарагт Иракт нийтдээ 7 удаа дэлбэрэлт болсон байна.

“Лалын улс” бүлэглэлийн босогчид таван байрлалд, тухайлбал, Басра, Багдадад халдлага үйлдсэн гэж тус бүлэглэл цахим хуудсандаа мэдээлжээ.

Иракийн хоёр дахь том хот болох Мосулыг босогчдоос чөлөөлөх зорилгоор тус улсын Засгийн газрын хүчин өргөн хүрээтэй цэргийн ажиллагаа явуулж байгаагийн хариуд дээрх халдлагуудыг үйлдсэн байна.