ОХУ-ын иргэдийг хөнөөсөн хэргээр ОХУ-ын шүүхээс 22 жилийн ял  аваад байгаа украины нисгэгч Надежда Савченког суллуулахын төлөө жагсаал Украины нийслэл Киевт Тусгаар тогтнолын талбайд боллоо.

Энэ үеэр түүний ээж охиныг минь суллахын төлөө Орост бүхий л зэвсгийн хүчээр цохилт өгөхийг Украины эрх баригчдаас шаардсан байна. Энэ талаарх мэдээг мэдээллийн rusvesna.su сайт дамжуулжээ.

Цуглаанд оролцогсод Украины засгийн газрыг нисгэгч Савченког суллах юм уу, сольж авахын төлөө боломжтой бүхий л арга хэрэглэх, үүн дотор ОХУ-д цэргийн цохилт өгөх хэрэгтэй хэмээн шаарджээ. Савченкогийн ээж гэхэд л охиныг нь суллахын тулд Украин улс армийнхаа бүхий л хүчин чадлыг дайчлах ёстой гэсэн байна.

Надежда Савченко одоо Оросын шоронд өөрт нь оноосон ялыг эсэргүүцэн 11 дэх хоногтоо хуурай өлсгөлөн зарлаад байгаа юм. Украины Гадаад хэргийн яам  түүн рүү украин эмч оруулахыг оросын эрх баригчдаас шаардаж байгаа ч оросууд түүнийг эмнэлэгт хэвтүүлэхээр нөхцөл байдал үүсээгүй гэж тайлбарлаж байгаа юм.