Японы Кюшью аралд энэ сарын 14-ний орой  болсон газар хөдлөлөөр амь үрэгдэгсдийн тоо өнөөдрийн байдлаар 44 хүрлээ, өнөө болтол газар доорхи түлхэлт үргэлжилсээр байна гэж NHK  телевиз мэдээллээ. Эхний газар хөдлөлөөс хойш өнгөрсөн тав хоногт нийтдээ 600 гаруй удаа их бага хэмжээгээр газар хөдөлж чичирхийлэл мэдрэгдээд байгаа юм байна.
Гаар доорхи түлхэлт тус арал дээрх Кумамото, Оита аймгийн нутагт голдуу тохиож байна.

Тав хоногийн өмнө Кюсю арлын төвд 7,3 магнитудын хүчтэй газар хөдлөл тохиож авто болон төмөр зам,  гүүр эвдрэн хөрс гулгаж гамшиг болсон юм. Энэ газар хөдлөлийн уршгаар 44 хүн амь үрэгдэж 1000 гаруй хүн бэртэж шархадсан бол 94 мянган хүн орон гэргүй болсныг аюулгүй газарт нүүлгэн шилжүүлээд байна.

Энэ газар хөдлөл нь 2011 онд 15 метрийн өндөр цунами үүсгэж Фукусимогийн цөмийн цахилгаан станцад осол гаргасан газар хөдлөлийн дараа орох хүчтэй гамшигт тооцогдож байгаа юм. 2011 оны тэр газар хөдлөл, цунамийн үеэр 20 мянга орчим хүн амь үрэгдэж, сураггүй алга болсон  юм.