БНАСАУ-ын армид алба хаадаг эмэгтэйчүүд байнга хүчирхийлэлд өртөж, эрх нь зөрчигдсөөр байна гэж Умардаас дүрвэж ирэгсдийн “Шинэ Солонгосын эмэгтэйчүүдийн нийгэмлэг” байгууллага нотолж байна.

Өмнөд Солонгосын мэдээллийн Рёнхап агентлагийн мэдээлснээр бол мягмар гарагт энэ байгууллагын зохион байгуулсан цуглаан дээр Умард Солонгосын ардын армид сувиагч байсан эмэгтэй “цэргийн дарга нарын зүгээс бараг өдөр бүр хүчирхийлдэг байсасн” гэж ярьсныг энэ нийгэмлэгийн тэргүүн Цой Су Хян мэдэгджээ. Бүсгүй энэ талаар намын хороондоо гомдол гаргасан ч хүчирхийлэгчид ямар ч хариуцлага ногдуулаагүй, харин ч өөрийг нь гутамшиг болгон зарласан гэнэ.

Цой Су Хян өөрөө өмнө нь Умард Солонгосын армид алба хааж байсан тухайгаа Сөүлийн хэвлэлд ярихдаа түүний алба хааж байсан салаанд 120 албан хаагчтайн 20 нь эрэгтэй офицер байсан, тэдний хоёр нь л гэхэд өөрийн захиргаандаа байгаа бараг бүх эмэгтэй албан хаагчийг хүчирхийлсэн гэжээ. 

БНАСАУ-ын Ардын арми нь бараг  сая албан хаагчтэй, дөрвөн сая хүн нөөцөд байдгаараа дэлхийн хамгийн олон хүнтэй арми юм. Энэ улсад 17 насанд хүрсэн хүнийг цэргийн жинхэнэ албанд татдаг юм байна.
Тус улсад эмэгтэйчүүд үндсэндээ сайн дурын үндсэн дээр цэргийн алба хаадаг гэх боловч 2015 оноос бүх эмэгтэйчүүдийг түргэвчилсэн хугацаагаар алба хаах болгосон гэсэн яриа бий.
2003 оноос тэдний алба хаах хугацааг 10 жилээр тогтоогоод дараа нь долоон жил болгож богиносгосон юм байна.