Энэ сарын 14-ний өдөр ОХУ-ын нийслэл Москва хотын Хованы оршуулгын газарт угсаатнуудын хооронд мөргөлдөөн болж зарим мэдээллээр бол 500 гаруй хүн зодолдон харилцан буудалцаж гурван  хүний амь бүрэлгэсэн  хэрэг гарсан. Зодооны үеэр хүмүүс бороохой, арматурын төмөр, бусад зүйлсээр нүдэлдэж, байн байн буун дуу гарч байсан гэж гэрчүүд хэлжээ.

Хууль сахиулагчид 50 гаруй хүнийг баривчлан саатуулсан хүмүүсийг шалгах явцад тажикууд, эрүүгийн элементүүд, Москвад хууль бусаар оршин сууж, хөдөлмөр эрхэлдэг хүмүүс  оролцсон  нь тодорхой болжээ.
Саатуулсан хүмүүсийг байцаахад сэжигтнүүдийн нэгний нь төрөл садныг оршуулах ажлыг гүйцэтгэсэн тажик иргэд энэ ажлаа чанаргүй хийснээс болж зөрчил үүссэн гэнэ. Нэгэнт ажлыг чанаргүй гүйцэтгэсэн болохоор захиалагч мөнгөө төлөхгүй гэсэн байна. Гэтэл маргааш нь шарилыг бүр аймаар болгон сүйтгэсэн байжээ.

Тэрээр ажлаа чанаргүй хийчихээд, мөнгө төлөөгүйн төлөө ингэж өшөө авсанд нь дургүйцэн тэдэнтэй тооцоо хийхээр өөрийн талынхан, самбочдыг дуудсан байна.
Мэдээж нөгөө тал нь өөрийн нутгийнхныг дуудсанаар зодоон эхэлжээ. Оршуулгын газрын захирал асан Юрий Чабуевыг  ч бас энэ хэрэгт холбоотой гэж үзэж байгаа юм байна. Тажикууд оршуулгын газрын эргэн тойронд талийгаачид зориулсан хөшөө, шарилын хайс хийдэг жижиг цехүүд байгуулан цэцгийн хэлхээ бэлтгэн худалдаалж өдөртөө дөрвөн сая орчим рублийн орлого олдог байж.

 Гэхдээ байнга ийм зөрчил, маргаан гардаг байсан нь ийм мөргөлдөөн нэг л өдөр болно гэсэн сэжиг төрүүлж байжээ.
Нутгийн тэмцэгч, бүлэглэлийнхэн хууль бусаар  амьдарч, ажиллагсад өөрсдийн нь газар нутаг дээр ийм их орлого олж байгаад таагүй хандаж, газар нутгаа чөлөөлөх гэж заналхийлдэг байсан нь ийм таамаг төрөхөд хүргэж байгаа юм байна.