Япон улсад зохион байгуулагдаж буй Азийн гэрэл зургийн фестивальд манай улсаас шилдэг 25 гэрэл зурагчнаас бүрдсэн баг оролцохоор явлаа. Нөгөөдөр нээлтээ хийх энэ фестивальд анх удаа манай улсын гэрэл зурагчид оролцож байгаа юм. Зохион байгуулагчдын зүгээс манай орны гэрэл зурагчдын бүтээлд анхаарал хандуулан үзэсгэлэнгийн хуваарийг нээлтийн үйл ажиллагаатай давхцуулжээ.

Монголын шилдэг гэрэл зурагчдаас бүрдсэн багт хоёр эмэгтэй зурагчин багтсаны нэг нь манай сонины Хариуцлагатай нарийн бичгийн дарга, Компьютер гэрэл зургийн албаны дарга, гэрэл зурагчин Ш.Отгонжаргал. Тэрээр өмнө нь бие даасан болон эмэгтэй гэрэл зурагчидтай хамтран олон үзэсгэлэн гаргасан бөгөөд хамгийн сүүлд гэрэл зураг үүсч хөгжсөний 80 жилийн ойг тохиолдуулан үе үеийн төлөөлөл багтсан 13 эмэгтэй гэрэл зурагчны “Бүсгүйн мэлмий” үзэсгэлэнд оролцож гэрэл зургуудаараа үзэгч олны мэлмийг баясгасан билээ. Түүний хувьд сэтгүүлч мэргэжил эзэмшсэн ч бүтээлч, хөдөлмөрч зан чанар болон сонирхолдоо тулгуурлан гэрэл зургийн салбарт орж 19 дэх жилдээ ажиллаж байгаа юм.

 Ардчилсан хувьсгалыг тунхаглан зарлаж төрсөн “Ардчилал” сонин өдөр тутмынх болж дахин төрөхөд өлгийдөн авсан анхны уран бүтээлчдийн нэг бол яах аргагүй Ш.Отгонжаргал. Өдөр тутмын сонинууд дундаа манай сонин гэрэл зургаараа өөрийн гэсэн өнгийг бий болгож оргилыг дархалж чадсан. Энэ нь ч Ш.Отгонжаргалын хөдөлмөрч, кадр бүрээ бүтээл болгож чаддаг мэдрэмжтэй холбоотой билээ. Тиймээс сонины хамт олноос нь Ш.Отгонжаргалынхаа уран бүтээлд амжилт хүсч байна.