Италийн Il Giornale сонин Адольф Гитлерийн национал-социализмыг тунхагласан “Майн Кампф” / Миний тэмцэл” номыгүнэгүй тарааж бэлэглэсэн нь Аппеннинд улс төрийн бөөн дуулианы эхлэл боллоо.
Сонины ерөнхий редактор Алессандро Саллусти бямба гарагийн дугаартайгаа хамт Гитлерийн улс төрийн тунхгийн найман ботийн эхний номыг уншигчиддаа түгээхээр шийдвэрлэсэн байна. Үүнийг италийн еврейн нийгэмлэг, ерөнхий сайд Маттео Ренци тун таагүй хүлээн авчээ.
Ромд суугаа израилийн Элчин сайдын яам, еврейн нийгэмлэг  ийнхүү “Майн Кампф”-ыг хэвлэж түгээснийг  “тун таагүй үйлдэл” гэж нэрлэснийг la Repubblica сонин нийтэлжээ.
Ерөнхий сайд Ренци ч твиттер хуудсандаа “Италийн өдөр тутмын сонин өнөөдөр “Майн Кампф”-ыг нийтэлсэнд харамсч байна” гэж бичсэн байна.
Харин энэ шүүмжлэлийн хариуд “Il Giornale”-ийн ерөнхий редактор Саллусти “ХХ зууны эмгэнэлийг түүхийн үүднээс авч үзэхээс айх хэрэггүй, тэгээд ч энэ гамшиг хэрхэн эхэлснийг ойлгох хэрэгтэй” гэсэн байна.