Хятадын Зянсу мужид өнгөрсөн 50 жилд болж байгаагүй хүчтэй хар салхи дэгдсэний улмаас 99 хүн амь алдаж,  840 хүн бэртэж гэмтэн, 1500 орчим хүн орон гэрээ орхин дүрвэхэд хүрчээ.
Яньчэн хот, хөрш районуудад аврах багийнхан ажиллаж, барилга байшингийн нуранги дороос эрэн хайх ажиллагаагаа үргэлжлүүлж байгаа ч амь үрэгдэгсдийн тоо улам нэмэгдэх нь хэмээн эрх баригчид сэтгэл зовниж байна.  Салхины улмаас олон районд ургаа мод булга үсрэн, цахилгаан дамжуулах шугамын шонгууд унаснаар цахилгаан тасарсан байна. Салхинд олон арван барилгын дээвэр хуурч, автомашин хийсэн онхолджээ.
БНХАУ-ын дарга Си Зиньпин байгалийн гамшигт нэрвэгдэгсдэд туслах бүхий л арга хэмжээг авах, орон гэргүй болсон иргэдэд зориулж, түр сууц барихыг бүх шатны эрх баригчдад үүрэг болгосон байна.
Хятадын зүүн нутгаар аадар бороо, мөндөр орж, хүчтэй салхи дэгдсэн нь ийм гамшиг учруулаад байгаа юм.