АНУ-ын Сан Диего хотноо энэ сарын 24-26-нд болсон “Extreme memory tournament” ой тогтоолтын халз тэмцээнд эх орноо төлөөлөн Монголын оюун ухааны академийн таван тамирчин оролцсоноос олон улсын их мастер Э.Пүрэвжав мөнгө, ОУ-ын мастер З.Цэцэгзул хүрэл медалиар энгэрээ чимлээ. Өсвөрийн тамирчид маань нас болоод үзүүлсэн амжилт, энэ спортоор хичээллэсэн жил ахиу тамирчдыг илүүрхэн ялалт байгуулсан байна.

Олон улсын их мастер Э.Пүрэвжав дэлхийд чансаагаараа тавдугаарт бичигдэж буй өсвөрийн дэлхийн аварга, ОУ-ын их мастер Саймон Рэйнхардтай өрсөлдөн, алтаас атгаад буцсан. Тэрээр чансаагаараа нэгдүгээрт бичигдэж буй дэлхийн аварга, Германы тамирчин Йоханнес Маллоуг 4:0 харьцаагаар илүүрхэн ялалт байгуулсан нь үзэгч, шүүгчдийг алмайруулж чадсан юм. Түүнчлэн Аллекс Мүүлленийг 4:3 харьцаатайгаар буулган авч, ялалт байгуулсан нь мөн л шуугиан тарьсан юм.

Харин З.Цэцэгзулын хувьд тэмцээний өнгөрсөн жилийн аварга Йоханнес Маллоуг 4:1-ээр буулган авснаар хүрэл медалийн эзэн болсон юм. Тус тэмцээнд 24 тамирчин өрсөлддөг бөгөөд өнөө жил Германы долоо, манайхаас тав, Америкийн дөрөв, Английн гурав, Шведийн хоёр, Нидерланд, Филлиппин, Хятад улсаас тус бүр нэг тамирчин оролцсон. “Extreme memory tournament” ой тогтоолтын халз тэмцээнд манай улс гурав дахь жилдээ оролцсон нь энэ. Өнгөрсөн жил Монголын Оюун Ухааны академийн тамирчин Т.Энхжин “Images” төрөлд дэлхийн дээд амжилтыг шинэчлэн тогтоож, манай баг тамирчид шагналын мөнгөн дүнгээрээ хоёрдугаар байрт орсон билээ. Сонирхуулахад, тус тэмцээн 75 мянган ам.долларын шагналын сантай юм.