Дуучин Леди Гагаг буддын шашны тэргүүн, дээрхийн гэгээн Далай ламтай уулзсаны нь төлөө түүний дууг олон нийтийн мэдээллийн бүхий л хэрэгслээр дамжуулахыг Хятадад хориглосон байна. Хятадын Хэвлэл, кино, телевиз, радио нэвтрүүлгийн асуудал хариуцсан удирдах газар ийм хориг гаргалаа хэмээн Asian Correspondent хэвэлэл мэдээлснийг оросын Интерфакс агентлаг дамжууллаа.

Дээрхийн гэгээн Далай лам энэ зургадугаар сарын 26-ны өдөр америкийн Индианаполис хотноо айлчлах үеэрээ поп дуучинтай ердөө 20 минут л уулзсан юм. Энэ үеэр дуучин, гэгээнтэн хоёр бясалгалын тухай, хүн илүү их бүтээлч, энэрэнгүй байхын учир, сайхан сэтгэлийн хүчний тухай л ярилцсан юм байна.
Энэ уулзалтынхаа тухай нэлээд хэдэн зургийг луучин Леди Гага Instagram-даа тавьжээ.

Дээрхийн гэгээн Далай лам нь Монгол, Төвд болон  оросын Халимаг, Буриад, Өвөр байгаль, Тувад дэлгэрсэн шарын шашны тэргүүн юм.
Төвдийг Хятадаас салгах сонирхолтой хэмээн Далай ламыг Хятад буруутгаж Хятадын газар нутгийн бүрэн бүтэн байдлыг хүндэтгээд далай ламтай уулзахгүй байхыг гадаад орнуудын удирдагчдад уриалдаг юм.