Мэдээллийн Al Masdar News сайтын мэдээлснээс үзвэл алан хядагч  “Лалын улс” зэвсэгт бүлэглэлийн дайчид Сири-Иорданы хил дээр байрладаг “Сирийн шинэ арми”-ийн дайчдын байрлал руу довтолж тэдний америкийн терроризмын эсрэг тэмцэлд ашигла гэж өгсөн зарим зэвсэг техникийг нь булаан авсан байна.

“Лалын улс” зэвсэгт бүлэглэлийнхэн “Сирийн шинэ арми” бүлэглэлийн босогчид руу дайрч байгаа нь ганц энэ удаа биш. Зургадугаар сарын 27-нд Сирийн Абу-Кемаль хотыг авах тулаанд “Лалын улс” бүлэглэлийнхэн бас босогчдыг дийлсэн юм. Уг нь “Сирийн шинэ арми”-ийнхан эхлээд амжилттай давшиж хот руу 30 орчим км дайрч орсон ч “Лалын улс” бүлэглэлийнхэн хариу цохиж хотыг өөрийн хяналтдаа авсан юм.

Энэ тулааны үеэр лалынхан  “Сирийн шинэ арми”-ийн босогчдоос 40 хүнийг устгаж 15 хүнийг, байлдааны талбарт орхисон бүх зэвсэгтэй хамт олзолж авсан юм. Босогчдын үлдсэн хэсэг нь байрлалаа орхиж Сири-иорданы хил дээрх Танфе баазад очсон юм байна.

Сирийн лалуудын бүрэлдхүүнтэй “Сирийн шинэ арми” зэвсэгт бүлэглэлийг “Лалын улс” зэвсэгт бүлэглэлтэй тэмцэх зорилгоор АНУ-ын оролцоотойгоор 2015 оны тавдугаар сард байгуулсан юм.