Б.БАДРАЛ

Орос, Америк хоёр “Лалын улс” нэртэй алан хядах бүлэглэлийн гол толгойлогчдын нэгийг хэн нь үнэн хэрэг дээр алсан тухай хэрүүл дэгдээлээ.
Наймдугаар сарын 31-нд Оросын Батлан хамгаалах яам нь Сирийн Мааратат-Умм-Хауш мужид Су-34 бөмбөгдөгч онгоцноос хийсэн дайралтаараа “Лалын улс” бүлэглэлийн гол толгойлогчдын нэг Аль-Аднани гэгчийг устгасан тухай мэдээ цацсан. Гэтэл Америкийн Батлан хамгаалах яам энэ мэдээг “үндэслэлгүй дэмийрэл” гэж тайлбарласан юм. Ийм сэтгэл хөдлөл бүхий тайлбар хийх болсон шалтгааны талаар тэд хэлэхдээ наймдугаар сарын 30-нд Сирийн Эль-Баб хотын орчим тусгайлан Аль-Аднанийг устгах зорилгоор бөмбөгдөлт хийсэн тухайгаа сайтаар мэдэгдсэн гэсэн юм. “Лалын улс” бүлэглэл нь Аль-Аднанийг бөмбөгдөлтөд өртөн алагдсан нь үнэн гэж мэдэгдэхдээ яг аль улсын агаарын цохилт, тэсрэх бөмбөгөнд өртөж амиа алдсан гэдгийг тодруулаагүй. Үр дүнд нь хоёр их гүрэн хэн нь жинхэнээр хүн алсан талаар яамдын түвшинд маргаж эхэлсэн нь энэ. Ямар ч гэмтэй хүн байсан хүний амь хөнөөнө гэдэг том нүгэл гэдэг. Гэвч орчин үед энэхүү зарчим үйлчлэхээ больсон бололтой.