2001 оны есдүгээр сарын 11-ний террорист халдлагаар амь үрэгдэгсдийн ар гэрийнхэн нь Саудын Арабын эсрэг шүүхэд хандан нэхэмлэл гаргахыг зөвшөөрсөн хуулийг АНУ-ын Конгресс  баталсны дараа анхны хүн шүүхэд нэхэмжлэл гаргасан байна.
Нисэх онгоц хулгайлан Нью-Йорк, Пенсильвани, Вашингтоныг зорьж халдлага үйлдсэн 19 терорист алан хядагчийн 15 нь Саудын Арабын иргэн байснаас Конгресс ийм хууль баталжээ.

АНУ-ын нийслэлийн оршин суугч Стефани Росс Десимоны нөхөр Пентагонд ажиллаж байгаад тэр халдлагаар нас барахад тэрээр жирэмсэн байжээ.
Бүсгүй, өөрийнхөө болон охиныхоо өмнөөс гаргасан өргөдөлдөө Саудын Арабыг алан хядагч “Аль-Каида” байгууллага, түүний удирдагч Усама бен Ладеныг дэмжиж байсан гэж буруутгасан байна. АНУ-ын Тэнгисийн цэргийн флотод алба хааж байсан нөхөр Патрик Данны амь насыг хөнөөхөд Саудын Арабын энэ бодлого нөлөөлсөн гээд нөхөн  төлбөр нэхэмжилжээ.

Тэрээр нөхрийнхөө амь нас, өөрсдөд нь учирсан сэтгэл санааны хохирлын төлөө мөнгөн төлбөр нэхэмжилсэн гэсэн ч хэдий мөнгө нэхэж байгааг тодорхой мэдээлээгүй байна.

Харин Саудын Арабын Гадаад хэргийн яам АНУ-ын баталсан энэ хууль нь олон улсын харилцаанд хэдэн зуун жилээр дагаж мөрдөж ирсэн улс орны тусгаар байдалд харшилж байна гэж мэдэгдээд байгаа юм.